Dialek Nagan Raya ngon Acèh Barat

oleh Safriandi, S.Pd.

 Basa Acèh nakeuh salah saboh basa nyang na di Provinsi Nanggroe Acèh Darussalam. Rap mandum ureueng Acèh geupakèk basa nyoe untuk geupeugah haba ngon seusama. Basa Acèh geutanyoe nyoe menurôt hasé penelitian, na hubungan ngon basa Campa nyang na di Vietnam, Kamboja, ngon Hainan di nanggroe Cina. Pakon jeut lagèe nyan? Lombard, sidroe ahli sijarah (2007:62) geupeugah bak masa dilèe di Acèh trôk sidroe pangeran dari Campa. Nan pangeran nyan nakeuh Šah Pu Liaŋ (liŋ). Gobnyan geuusé lé bangsa Vietnam dari ibukota teumpat gobnyan tinggai. Kareuna geuusé dari tempat tinggai, gobnyan geujak mita perlindungan u Acèh. Trôk u Acèh, gobnyan geupeugöt wangsa barô. Basa nyang dipakèk lé wangsa nyoe keuh nyang berpengaruh bak basa geutanyoe, basa Aceh.

Nyan bacut sijarah basa geutanyoe. Basa geutanyoe nyoe na leubèh jih lagèe basa-basa laén nyang na di dônya nyoe. Pu mantong leubèh nyang na lam basa geutanyoe? Salah saboh leubèh jih lam hai dialèk. Basa geutanyoe na cit dialèk. Dialèk nyoe nakeuh variasi basa nyang dipakèk lam saboh daèrah. Le macam dialèk basa Acèh geutanyoe. Na dialèk Acèh Barat, dialèk Nagan Raya, dialèk Acèh Rayek, dll.

Lam tulésan nyoe, nyang penulis bahas nakeuh basa Acèh dialèk Nagan Raya ngon Acèh Barat. Lam basa Indonesia, geutanyoe tom tadeungo kata “buah gambas”. Lam basa Acèh, kata nyoe na daèrah nyang kheun “boh p’ok” na cit daèrah nyang kheun “boh pik”. Umum jih “boh pik” geukheun lé ureueng Acèh blah timur, sedangkan “boh p’ok” geukheun lé ureueng Acèh blah barat. Nyang unik nakeuh makna dari kata “boh pik” nyang geukheun lé ureueng Acèh blah timu nyoe geuanggap tabu lé ureueng Acèh blah barat, kecuali nyang ka biasa geudeungo. Meunyoe bak ureueng nyang di blah barat, “boh pik” makna jih “leubèh mengarah bak hai nyang negatif. Meunyoe bak ureueng nyang na di blah timu “boh p’ok” maknajih pih leubèh mengarah bak hai nyang negatif. Jadi, di Acèh blah barat menyoe takheun boh pik, jianggap aneh, meunan cit di Aceh blah timu.

Hai nyang laén jeut takalon nakeuh bak makna kata mok. Makna mok lam basa Acèh bak kapubatén Nagan Raya ngon Aceh Barat nakeuh alat sukat breuh, teumpat jib ie. Jadi, menyoe keumeung jip ie, ureueng Nagan Raya geukheun Kacok mok siat! Lon meujib ie, Kapuduk bu siat dua boh mok!

Basa geutanyoe na cit variasi dialèk lam hai bunyi. Lam basa Acèh, geutanyoe kayém tadeungo kata “asèe, seuribèe”. Di Acèh Barat, terutama ureueng nyang na di Keucamatan Sama Tiga, suku kata akhé bak saboh kata nyang bunyi jih èe jeut keu ai, oe jeut keu au. Jadi, kata asèe, seuribèe geukheun asai, seuribai, kata meunyoe, baroe geukheun “menyau, barau”. Akan tetapi, hana mandum ureueng nyang na di Acèh Barat geupeugah basa Acèh nyang lagèe nyoe rupa. Di Nagan Raya keudroe, bentuk-bentuk lagèe seuribai, asai, meunyau, barau nyang geupakèk lé ureueng nyang na di Kecamatan Sama Tiga nyoe, hana.

Bahpih meunan, kabupatén Nagan Raya nyoe na cit dialèk. Di kabupatén nyang teubentuk bak thôn 2002 nyoe, kata bunoe nyang kayém geupakèk bak basa Acèh, lé ladôm ureueng Nagan Raya geukheun meunoe/munoe nyang lam basa Indonesia arti jih tadi. Hai laén nyang jeut takalon di kabupatén nyoe nakeuh bak pemakaian geu-. Lam basa Acèh umum, geu- jipakèk keu ureueng keulhèe, miseu bak kalimat Gobnyan geujak u keudèe, Gobnyan geukoh naleueng. Bentuk geu- nyoe hana jipakèk untuk menyapa ureueng nyang keudua, miseu Panè geujak meunoe?, Pat geutinggai droeneuh? Nyang jipakèk untuk menyapa ureueng keudua nakeuh neu-, miseu Panè neujak meunoe? atawa Pat neutinggai droeneuh? Meunyoe di Nagan Raya, umum jih bentuk nyang dipakèk untuk menyapa ureueng keudua nakeuh geu-. Jadi, nyang geukheun lé ureueng Nagan Raya untuk menyapa ureueng keudua nakeuh Panè geujak gata? Pat geutinggai droenueh? Kon Panè neujak meunoe?, atawa Pat neutinggai droeneuh?   

Seulaén variasi lam pemakaian, basa Acèh nyang geupakèk lé ureueng bak kabupatén nyoe nakeuh bak pemakaian bentuk ku-. Meunyoe peugah haba ngon ureung tuha, aneuek muda di kabupatén nyoe umum jih geupakèk kata ku, miseu Mak, piréng nyoe kurah lé lôn laju jeut? Lôn kon h’an ék kujak, Kak. Nibak ureueng Acèh blah timu, ku nyang ureueng Nagan Raya pakèk watèe peugah haba ngon ureueng tuha cukôp gasa ngon h’ana sopan. Meunyoe di Nagan Raya, hai nyoe hana masalah. Bukti jih, watèe penulis deungoe aneuek muda-aneuk muda geupeugah haba ngon ureueng tuha, awaknyan geupakèk ku-. Ureueng tuha nyang deungoe pih hana geuteugur.

Seubeutoi jih le mantong dialèk nyang jeut tabahas. Cuma, hai nyoe hana mungkén tabahas ban mandum. Nyang peunténg geutanyoe teupeu nakeuh basa Acèh geutanyoe na variasi lam hai makna, bunyi, atawa struktur kalimat. Geutanyoe seubagoe ureueng Acèh nyang sama-sama tapakèk basa Acèh teuntèe beutahargai variasi nyoe seureuta h’an jeut taanggap basa Acèh geutanyoe nyang gèt, seudangkan basa Acèh ureueng laén h’ana gèt atawa brôk. Ban mandum basa gèt, meunan cit basa Acèh bahpih na variasi. Nyang peunténg ureueng nyang pakèk basa nyan geuakui variasi nyang lagèe nyan rupa awaknyan pakèk seureuta h’ana masalah bak ureueng nyang pakèk nyan.

3 pemikiran pada “Dialek Nagan Raya ngon Acèh Barat

  1. Bahsa Lam Teuba ngon Lam Panah (di Aceh Rayek) na saban ngon bahsa Aceh di Sama Tiga, Aceh Barat.

    Sabanjih bak kata-kata:
    * batee –> batay
    * lakee –> lakay
    * ulee –> ulay

    * bloe –> blow atau blaw (ragu)
    * soe –> sow atau saw (ragu)

    Peue ureueng Lam Panah & Lam Teuba geujak meunanggroe u Sama Tiga atawa sibalekjih ?

Tinggalkan Balasan

Please log in using one of these methods to post your comment:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s